باسم يوسف يوضح حقيقة ما حدث خلال عرضه المسرحي.. وقريباً في لبنان
بعدما قام احد الاشخاص بشتمه خلال عرضه المسرحي في لندن، اوضح الاعلامي المصري الساخر باسم يوسف حقيقة ما تعرض له من خلال تعليق نشره على صفحته الخاصة على موقع فايسبوك.
وقال “يوسف” على صفحته الخاصة: “للتوضيح بس عشان اللي حصل في لندن. طبعا في عناوين بتقول اني عملت عرض مسرحي يحرض ضد مصر و فيه مصريين هاجموني و شتموني و الكلام المحفوظ ده. الحقيقة ان دول كانوا عبارة عن خمسة او ستة واضحين انهم مزقوقين من الاول وعمالين يغلوشوا عليا من الاول. ”
واضاف: “واللي يطّلع يقول انا خاين واللي يطّلع يقول ان السيسي هو مصر ومصر هي السيسي واللي يطّلع يشتم . عرفت بعد كده لما وريت صورهم لناس اعرفهم في لندن ان دول محترفين غلوشة و بلطجة و مزقوقين من اجهزة معينة. و بيكتبوا تقارير في المصريين اللي هنا بل ان فيه واحد منهم معموله محضر هنا عشان هدد واحدة من المتظاهرات قدام السفارة بالقتل.”
وتابع “يوسف” موضحاً : “المهم انا رفضت ان يتم اخراج اي حد من العرض و كنت متوقع ان الموضوع كله معمول عشان يتم تصوير دقيقتين و ينزلوا على النت وده فعلا اللي حصل بعد نص ساعة من نهاية العرض ونازل مع ترجمة واخر حلاوة. المهم كان فيه ناس في المسرح مع النظام وضد النظام ولا حد حس ان فيه اهانة لمصر او تحريض لا اي حاجة .”
واضاف: “انا بأطلع في سي ان ان و ووسائل إعلام مختلفة لو عايز أحرض كنت حرضت من زمان . بالعكس الناس على اختلاف ميولها استمتعوا جدا. المحزن ان موارد البلد بقت تتصرف عشان حبة بلطجية يدفعوا تذاكر عشان ييجوا يعملوا حركات عيال و يغلوشوا زي بلطجية الافراح. انا سعيد جدا بليلة امبارح دي وباستقبال الناس ليا و ياريت يتم توظيف موارد البلد في حاجات
احسن من كده.”
وختم عارضاً احدى الشهادات على صفحته: “ودي واحدة من الشهادات للناس اللي حضرت العرض”
نذكر ان في الثالث من آب/اغسطس المقبل يطل الكوميدي المصري الساخر باسم يوسف على جمهور ضمن مهرجان بيت الدين الذي يقام سنوياً في لبنان في أمسية ضاحكة.
