متابعة خاصة – طارق كرم يرفع الصوت والسقف ويشن هجوماً على الاعلام
وضع صاحب شركة rooftop production منتج برنامجي “ما في متلو” و”هيدا حكي”، طارق كرم، اصبعه على الجرح وتحدث بكل شفافية عن وضع البلد وما وصلت اليه وسائل الاعلام.
وقال طارق كرم على صفحته الخاصة على موقع فايسبوك: “الأسبوع الماضي وصل على لبنان صديق قديم ولكن غير مقيم مع زوجته البريطانية كارلي ومتل العادة اللبنانية قمنا بحسن الضيافة من بحر وشاليه ومطاعم وزيارة الى سيدة حاريصا وسهر وWhite وCaprice وجِيّة وإده ونعص”.
واضاف كرم: وقبل ما تغادر الإخت كارلي الى لندن قالت الجملة ال Cliché التي نسمعها من كل سائح إن لبنان أجمل بلد في العالم وصورة لبنان هي كليًا غير التي نراها على التلفزيون…. إيه التلفزيون!!!!”.
وتابع “كرم”: التلفزيون الذي ينقل صورة لبنان للداخل والخارج… الخارج عن المألوف…. التلفزيون الذي يتّكل على سوق الإعلانات ليغطي مصاريفه وعلى أمل لن يربح” واضاف ممازحاً “يربح شوفة حنا ونعمة والياس والمياومين والحجيري وحرق الدواليب عا شارل حلو وتلحيم البوابات بشركة الكهرباء وداعش والمخيمات وقبلها تسكير طريق المطار والخطف والكبتاغون”.
واكد “كرم” انه مع تغطية الاخبار كل التفاصيل وقال: “انا مش طالب منكن تمنعوا او ما تغطوا بالأخبار المسمّة الساعة ٨ هالحركات أو التحركات ما بعرف شو بيسمّوها…. بس إذا كل يوم في ٨ ساعات Live لحنا ونعمة تا يعلّو معاشاتن والمدارس والسوبر ماركتس بالمقابل تسلخنا بالأسعار متل البقر ولا مين بيحاسب”. وتابع على طريقته “المهضومة”: “إذا الإخوة المياومين صاروا من فلكلورنا اليومي عالتلفزيونات Live وبعدن بيسبوا جبران باسيل والهيئة ما معن خبر انو ترقى وصار وزير خارجية… حدا في يفسرلي وين بدو يضل في مساحة للمعلن تا يصرف مصرياتو عا شاشاتنا؟؟؟”.
وتابع “كرم”: “خيي خلينا نقول انضرب عا راسو صاحب معمل اللبنة أو وكيل الشامبو يللي بيزيل القشرة وحط إعلانو عا شاشتكن الكريمة وفجأة فوق إعلانو بيطلع Ticker إخباري عن تقدم داعش بجبال سنجار، والله لتحمض اللبنة ويهرّوا شعراتو لأخونا المعلن…. خيّي ال Regional Marketing Manager الهندي أو الإيرلندي تبع شركة السيارات يللي قاعد ورا مكتبو بال AC بدبي ومقرر يصرف Budget بتلفزيونات لبنان ويشوف عا طرق النفس حنا ونعمة Live كل يوم أكيد سيغيّر رأيه وال MBC أقرب له”.
وختم قائلاً: “دولتنا في حالة إنحلال وبلد ماشي بالعجيبة، ووسائل الإعلام تساهم عن غير قصد بإنحلال من نوع تاني رح يصيبها لإلها قبل ما يصيب البلد… ومتل فولكلور النشرة الموحدة يا ريت بتتوحدوا عا قرار وقف مهزلة ال Live البلا طعمة لنعمة…. وبانتظار Deal جديد ما تنسوا تربحوا الجيش جميلة وتبعتوا رسالة عال 1106 وتحطّوها عالفايسبوك، ومن هلق لوقتها الله يرحم نور وداني وداني وبيار وحسين وكل شهدا الجيش وتصبحوا عا وطن وتلفزيون”
لا شك في ان هذا الموقف الذي اطلقه طارق كرم يعبّر عن شريحة كبيرة من الشعب اللبناني الذي ضاق ذرعاً من هذا النقل المباشر لكل شاردة وواردة ما يسبب حالة من التوتر التي تلازم هذا الشعب المغلوب على امره والذي مل العيش في هذه الاجواء المشحونة على مدار الساعة في حين يسعنا كاعلام ان نخفف من وطئة الاحداث ونحصرها في نشرة واحدة ونساهم بالمقابل الى حد بعيد باحياء هذا البلد الغارق في مصائب تبدو حلولها بعيدة وربما مستحيلة فلنتحمل مسؤوليتنا كإعلام ونحد من التوتر الذي نتسبب به
وقد سبق لطارق كرم ان اطلق موقفاً اثناء الحرب التي خاضها الجيش اللبناني ضد لارهاب في منطقة عرسال البقاعية وقد لاقت حينها كلماته صدى وتداول رواد مواقع التواصل الاجتماعي تصريحاته.
