مجدي كامل خاص لبصراحة : ما فيش داعي للمقارنة بيني وبين أحمد ذكي

مجدي كامل ممثل أضحى اليوم من نجوم الصف الأول في مصر والعالم العربي ،  بكالوريوس في المعهد العالى للفنون المسرحية ،  متزوج من الممثلة الشابة مهى أحمد من أهم أعماله ( فتاة من إسرائيل – التجربة الدينماركية – حبك نار ..) وجمال عبدالناصر

  

أولاً يا ليت تعرّف الجمهور عنك أكثر

سلام عليكم  أنا : مجدي كامل محمد عبدالمجيد ، ممثل ، برج القوس ، 44 سنة .

  

بما أن حضرتك خريج معهد الفنون المسرحية وبنفس الوقت أنت تدّرس فيه .. ماذا أضاف ذلك الى مجدي كامل؟  

يعني الموهبة وحدها لا تكفي … يجب أن تدرس وتتعلم لتثقل الموهبة والحاجة دي بتوسع آفاقك وبتزيد معرفتك بكل المجالات ( أدب ، ثقافة، سياسة و إقتصاد… ) عشان توصل في الآخر للشهرة والنجاح .

 

ما هو الدور ام العمل الاقرب الى قلبك والذي استمتعت بلعبه؟

والله بحب كل حاجة لكن بقول ان هو جمال عبدالناصر طبعاً … عشان أنا أزحت الستار بعد 38 سنة عن حياته… في أجيال كثيرة عاوزة تعرف حجات عنه وعن حياته وأعماله… عشان هو كان ولا زال القدوة للشعب العربي ….

  

من بعد كل هذه السنين على رحيله، كيف تمكّنت من تأدية دور شخصية الكبير عبد الناصر ؟

الممثل بيجيب معلوماته من 3 حاجات : أما عن طريق القراية أو حد حكاله او عن طريق الشوف .. يعني مثلاً أن  كان معايا 38 دفيدي عن حياته بالإضافة الى 10 سديات عن الخطب المسموعة الى جانب أني بتفرج على الكومنتري أو الأفلام الشخصية لعبد الناصر الى جانب أن أنت متشبع أساساً بالخلفية التاريخية عن حياة عبدالناصر … ( عيلته ، هو مين ، ثقافته،  أيه البيئة اللي كان عايش فيها ،  البعد النفسي والإجتماعي ) وفي الآخر أنا مش جاي أقلد عبدالناصر أنا جيت أجيب روحه وأعرضها أمام جمهوره .

  

من خلال أكثرمن تصويت كان هناك منافسة شرسة بينك وبين الممثل الراحل أحمد ذكي الذي  قدّم  أيضاً شخصية عبد الناصر ، هل هناك مجال للمقارنة؟  

بص المرحوم الفنان الكبير أحمد زكي ده الماستر و العبقري بتعنا.. هو اللي أدانا فرصة كتمثيل هو عمل فترة من حياة ناصر ،  لكن أنا بعمل 37 سنة من حياته والمسلسل كان غير الفيلم هو تقريباً  ساعة ونصف إنما المسلسل كان 22 ساعة يعني أنت بتحكي تاريخ ناصر من الميلاد للممات يعني أنا مش شايف أن في داعي للمقارنة عشان كل واحد عمل حاجة .

 

إذا تكلمنا عن الممثلة صابرين ، بعد تأديتها لشخصية كوكب الشرق أم كلثوم ، فكرت بالإعتزال وإبتعدت عن الشاشة لفترة كبيرة .. هل خطرت على بالك الفكرة؟

لا أنا مفكرتش بالإعتزال لأن أنا ممثل وماليش دعوة في اللي بتقوله صابرين ومقدرش أوقف عند دور محدد .

يعني الأدوار موجودة ولازم تقدي دايماً شيء جديد … يعني أنا بعد عبدالناصر قدمت مسلسل أسمه ( الأشرار) كان دوري صحفي وصولي بدون قيم ومبادئ  عنده طموحات مشروعة وغير مشروعة،  يعني  أنا ممثل شغلتي كخريج معهد فنون مسرحية أني أنوع …

 أنا عندي أحلام معينة يعني أنا دايماً بدوّرعلى ما هو بيمس الشعب … أي لازم تقدي شخصيات مختلفة عشان أنت تنّور أو تعلم الناس و الجيل الجديد يشوف من هو الأصلح ومن الفاسد ويختار الأصلح دائماً والكمال لله طبعاً  ..

 لكن أنت بتشوف دايماً أن المتلقي يتأثر بالفن اللي أنت بتقدمه يعني انا دايماً بحاول أقدم اللي هو يحترمني أنا شخصياً

وحبيت أقلك جملة بتهمني شخصياً :انا بحب يقولو لأبني لما يروح أي حته : ”  أن أبوك محترم “.

 

هل نستطيع القول أن الحظ حالف مجدي كامل للوصول الى نجوم الصف الأول؟ 

لا طبعاً … أنا خريج المعهد سنة 1993 … عملت أفلام في بداياتي ما كنتش كثيرة لكن كانت مؤثرة لما جت الفرصة وإشتغلت مع نجوم كبار زي عادل إمام في التجربة الدينماركية  ومحمد سعد وأحمد حلمي وإشتغلت كمان مع السقا وعملت فيلم لوحدي ( غرفة 707 ) مع الفنانة رولا سعد بالإفاضة لجمال عبدالناصر اللي هو إداني الشهرة الكبيرة لأن الإسم لوحده كان شهرة بالنسبة ليه .

 

أي دور تجد نفسك فيه أكثر، الدور الدرامي ام الفكاهي؟

والله أنا بحب التنوع وما يهمش الدور نوعه أيه أقد ما تهم الفكرة أو الهدف اللي حيوصلها للناس .

 

كلمات سريعة يا ليت تجاوبني عليها بسرعة  :

الحب : التفاهم

الوفاء : مش موجود

التمثيل : العشق

العدل : المساواة

السياسة : لعبة كراسي

العرب : الوحدة

 

كلمة أخيرة لمجلتنا :

أتمنى التوفيق الدائم للمجلة لإزاحة الستار عن الحقائق والأسرار يعني ما تلحقش الفضايح زي غيرها وأتمنى أنها تهتم بالمواضيع اللي تهم المجتمع كله

 

حاوره عبدالله إبراهيم