نادين لبكي ترّد على ابو العبد وتكشف سبب خوضها الانتخابات البلدية في بيروت

متابعة – بصراحة: اوضحت المخرجة اللبنانية نادين لبكي سبب خوضها معركة الانتخابات البلدية من خلال ترشحها ضمن لائحة “بيروت مدينتي” وذلك بعدما نشرت احدى الصحف “كاريكاتور” بشخصية ابو العبد البيروتي وكان يقول لها “خليك بفنك يا نادين شو بدك بها لبكي”.

نشرت نادين لبكي على صفحتها الخاصة على موقع فايسبوك “الكاريكاتور” مرفقاً بتوضيح مطول حول ترشحها عن مدينة بيروت وقالت:

صديقي أبو العبد ،
عم تسألني ” شو بدي بهل لبكي؟ ” 
أنا أكيدي البعض متلك عم يسأل حالو نفس السؤال:”مرشحة على انتخبات البلدية ببيروت؟!!!! ولك شو بدا بهل شغله! هيدا مش محلها !”
خليني قلك شو بدي بهل لبكي :
أنا هون من حرقة قلب. أنا هون مواطنة لبنانية عايشة ببيروت محبطة، حزينة، غضبانة، خايفة.
خايفة إفتح شباك بيتي لأني خايفة على ولادي من نسمة الهواء.
خايفة اتمشّى بالشارع بعد غياب الشمس لأنو ضوّ البلديه محروق .
خايفة على إبن الجيران يلي عم يلعب بالطابة بين السيارات لأنو ما في جنينة تستقبلو. 
خايفة على الصبي الحفيان يلي واقف على الإشارة ما تئشّو شي سيارة.
ولك حتى صرت خايفة من عقصة البرغشة. 
لمّ بدك توصف إنسان بالجبان بتقول عنو :”شو جبان بيخاف من البرغشة!” نحنا اليوم تحوّلنا لناس جبناء خايفين نعيش…
منعدّ للعشرة قبل ما نشرب نقطة المي.
منعدّ للميّة قبل ما نكدش كدشة من السندويشة.

أنا يمكن ميسورة قادرة ركِّب فلتِر للمي أو حطّ مكنة تنضِّف الجوّ ، بس الانسان الفقير يلي مارق المجرور بنص بيتو شو بيعمل؟ 
أول مبارح ٢٢ نيسان كان يوم عيد الأرض.
أيّ أرض والفرد ببيروت عايش بأقل من متر مربع مساحة خضرا؟
أيّ أرض و نسبة التلوث فيها مرتين أكتر من ما بتسمح منظمة الصحة العالمية؟
كيف بلدية بيروت عندها فائض مليار دولار، و ما زرعت شجرة تحت بيتي من ٦ سنين؟
كيف عندها فائض مليار دولار وبعد في ولاد عم تلعب football بين السيارات؟
كيف عندها فائض مليار دولار والزبالة صارت جبال على طرقاتنا؟
ليش كل ما بتشتّي الدني ما حداً في يوصل عشغلو من عجقة السير ؟
ليش ثلاث أرباع مبانينا التراثية بالأرض؟
ليش هلقد في استلشاق؟ ليش هلقد في تعتير ؟ ليش هلقد في لا مبالاة ؟
ليش ما عندي ولا جواب مقنع على ولا سؤال؟
“بيروت مدينتي” خلقت بقهوة بين شباب وصبايا خايفين متلي، وطافح كيلون متلي،
قرروا ياخدوا بزمام الأمور ويطبّقوا مقولة “ما بحِكّ جلدك إلا ضفرك” لأن القيادة السياسية التقليدية فشلت. فشلت بالتعاطي مع أمور وقضايا الناس. 
“بيروت مدينتي” هي مجموعة خبراء بمجال التنظيم المدني والبيئة والنقل والهندسة والاقتصاد والحفاظ على التراث.
مجموعة شباب وشابات، شمَّرِت على زنودها، ونزلت على الشارع تسأل الناس شو همومها ، وتعيش معها أوجاعها . 
ونظمت مساحات نقاش بكتير من المناطق البيروتية لتطلع ببرنامج ذكي، واقعي، مدروس، اولوياته الناس و جودة معيشتها.
“بيروت مدينتي” هي مجموعة ناس متطوّعة، نضيفة، مستقلة، شغوفة، ذكية، ناشطة، صرلا سنين عم تشتغل عالأرض بالظل بطريقة فرديّة لمصلحة بيروت. 
كل هالطاقات اجتمعت اليوم بمركز زغير ببدارو لتغيِّر واقعها. 
من هيك أنا هون اليوم. 
لصير وحدة منن. لقدم قد ما بعرف من خبرتي و نجرب سوا نرجِّع بيروت يلي منحلم فيا!
لأنو بيروت “ستّ الدنيا” صارت هلق ستّ مشوّهة، حزينة، تعبانة، أنجأ قادرة تمشي..
فإذا إنت متلي محروق وغاضبان سماع مني يا صديقي، تعا ننسا الحزب وننسا الطايفة، نحنا اليوم لبنانيين، ولاد بيروت ، وبيروت أمّنا ،متِّكلي علينا نرجع نوقِّفها عاجريها!
امشي أنا ويًّاك نغيّر الصورة وننزل سوا على صناديق الإقتراع ب ٨ ايارلنصوّت لخيار جديد، لفرصة أخيرة، لنصوّت ل ‫#‏بيروت_مدينتي ، بيروت مدينتك، بيروت مدينتنا.
صدقني يا صديقي بيروتي وبيروتك بتستاهل كل هل لبكي و أكتر. 
مع محبتي
نادين
وكانت حملة “بيروت مدينتي” قد اعلنت منذ يومين خلال مؤتمر صحافي عقدته في عين المريسة على كورنيش البحر، أسماء مرشحيها ال24 لمجلس بلدية بيروت، في حضور ناشطين وناشطات الحملة.  وتتألف اللائحة من ابراهيم منيمنة رئيسا، طارق عمار نائبا للرئيس. أما الأعضاء فهم: احمد قعبور، امال شريف، ايمان الحسن غندور، حسام حوا، رنا الخوري، ريتا معلوف، سيرج يازجي، عبد الحليم جبر، فرح قبيسي، كارول شبلي تويني، ليفون تلفزيان، مارك جعاره، ماريا مانوك، مروان الطيبي، منى الحلاق، مي الداعوق، نادين لبكي، نجيب الديك، ندى الدلال دوغان، ندى صحناوي، وليد العلمي ويوركي تيروز.