في عيد الام…تانت كوليت امنا كلنا
كل احزان وجروح العالم ما بيطلعو شي قدام جرحك وحرقة قلبك عا ضناكي رامي…
شو ظلمتك هالحياة و شو كان حكمها قاسي عليكي
لو شو ما بدي قول ما راح اوفي حقك، جد انك انسانة و ام رائعة بكل معنى الكلمة
ربيتي اولادك بدموع العين و احسن تربية…ربيتيهم بتعبك و مابيوم اعتمدتي عا حدا غير اولادك
مؤمنة هالايمان الكبير يلي ساعدك وخلاكي قوية مشان اولادك…
(بس بسأل ربي وبقول ليش حرمت تانت كوليت من رامي؟ هالأم يلي ما بيوم قل ايمانها بالعكس عندها ايمان كبير ما حدا بيتخيلو، ليش؟)
حنونة على اولادك وعلى كل شخص صادق بتعرفي حتى لو ل يوم واحد بتعرفي و قلبك ما في منو بطيبتو
وقت اجيتي عل اكاديمي مستحيل انسى هاليوم كيف كنتي مبسوطة برامي وكيف ظلو حاضنك و يبوسك و مو مسدق انك قدام عيونو وما كان بدو ابدا يتركيك
كان مشتقلك كتير… ما كان عم يشبع من حضنك و حنانك وما كان ابدا عرفان انو راح ينحرم من حنانك بهالسرعة هي
كيف كنتي عم تمسحي دموعو و تقوليلو حاجة تبكي و بوقتها قلت دخيل قلبو شو حنون و شو طيوب هالرامي
يا ريت لو يرجع رامي و يمسحلك دموعك يلي ما عم يوقفو
شو كان مبسوط انو خلص راح يشيل التقل منك “خلص يا ماما هانت” ما كان بيعرف رح يحرقلك قلبك بغيابو
~صادقة…طيبة… وعادلة صفات كتيره عندق يا امنا و كل هالصفات رامي ماخدها منك
بنعرف انك بتشوفي حالك برامي و انك رافعة راسك في لن رامي ما في متلو و ما راح يكون… رح ظل قول هالحقيقة ليوم موت
افرحي لأن رامي قديس بالسماء
يا ريت الامهات يخلوكي قدوة قدامون, الامهات يلي بيكذبو و بيشجعو اولادن عل كذب و الخداع
متل هاليوم السنة المضت رامي ما كان معك بس حكالك الي بقلبو و هالسنة عم يحكيكي من السماء نفس الحكي بس اكيد انو اشتقلك اكتررر
ما حدا وما في شي بالدنيا كلها راح يعوضك رامي بس بدنا نقلك: بنحبك كتير وانا عن حالي بحبك كتير كتير و انتي بالنسبة الي بمقامة امي و الله شاهد على كلامي
شو كنتي بتتمني لرامي يعيش العمر كلو… تشوفي و هو يتخرج و حامل شهادتو…تفرحي في وتشوفي عريس و تشوفي اولادو و تربيون و تلعبي مع احفادك
شو كان عندك احلام بس القدر خطفو لرامي منك و حرمتك الدنيا من الفرح عا بكير
بهالعيد عيد الام بدي قلك ربي يعطيكي القوة لتقدري تتحملي مصيبتك و ربي يعطيكي الصحة و العمر الطويل يا رب و يدموك فوق راس ناجي و شادي وفوق راسنا يا رب
كل سنة و انتي امنا
بنحبك كتير كتير
ايفيت
ان مجلّة بصراحة الالكترونية أفسحت بالمجال أمام قرّائها لإرسال مقالاتهم على اختلاف مواضيعها ولغتّها ونشرها والسماح بالتعليق عليها تشجيعاً منها لهؤلاء وايماناً منها بحرّية الرأي والفكر.
الا ان مجلّة بصراحة الالكترونية تحتفظ بحقّها في نشر او عدم نشر اي موضوع لا يستوفي شروط النشر وتشير الى ان كل ما يندرج ضمن “بريد القرّاء ” او mailbox لا يعبّر بأي شكل من الأشكال عن آراء اسرة التحرير وهي تلزم بمضمونها كاتبها حصرياً.
لإرسال مقالاتكم ، الرجاء مراسلتنا على mailbox@new2.bisara7a.com
