خاص- على طريقته وبأسلوبنا لقاء خاص مع مقدّم فقرة “مين قال” البير تحومي…ومين قال منّو نجم؟
هو من أهمّ نجوم شاشة “ام تي في” وبرنامجه نجم مثله ولا اعلم ان كان باستطاعتي تسميته برنامجاُ ، فهو عبارة عن دقيقة واحدة “نجمة” على الهواء ولا أبالغ ان قلت انها أكثر إفادة من برامج طويلة “بدون طعم او لون”على شاشاتنا اللبنانية.
يطّل علينا اربع مرات يومياً، يطّل كالنسمة “خفيفة نضيفة” حاملاً معه ابتسامته الجميلة وأسلوبه السلس،عفويّ هو ، لطيف و قريب جداً من القلب يدخله بدون استئذان واستطاع ان يستقطب مئات المعجبين الذين لا يفوّتون “دقيقته” مهما كان الثمن حتى أصبح حديث البلد ،الصغار قبل الكبار وهذا ما ترجمه الاعلان الاخير الذي صوّر في أسواق بيروت وهذا ما دفع كل الشخصيات الكوميدية الى تقليده في برامجها او على المسرح .
بإختصار يمكنني القول ان النجومية تفرض نفسها في معظم الاحيان وهي ليست رهناً ببرنامج ذو ميزانية خيالية ، فدقائق قليلة على الهواء كرّست البير تحومي نجماً على شاشة “ام تي في” لا يقّل شعبية وشهرة ونجوميّة عن نجوم آخرين مقدّمي اهم البرامج على الشاشة نفسها .
اردنا ان تكون لنا دردشة مع البير ، دردشة تشبهه وتشبه برنامجه الى حدّ بعيد فكان لنا معه هذا اللقاء السريع “على طريقته” ولكن “بأسلوبنا” وأصرينا على الاحتفاظ بالاجوبة باللهجة اللبنانية لكي لا يخسر اللقاء من عفويته .
مين قال انك اهضم حدن بطّل على شاشة ام تي في؟
Merci والقايل
مين قال انو النجوميّة ما بدها كتير تفلْسف وبفقرة صغيرة صرت نجم؟
حبيت وصّل رسالة قصيرة مهضومة ومفيدة، بتشبهني، وانا بكون مبسوط لمّا أعرف إنو الناس بتحكي بـ”مين قال”.
مين قال ما فيك تقدّم برنامج خاص فيك؟
الفكرة منّا بعيدة بس كل شي بوقتو حلو.
مين قال انو “ام تي في” تأخرت كتير لتعملك اعلان خاص فيك مع الجمهور بوسط بيروت ؟
الـMTV أنتجت عدّة إعلانات للبرنامج ولكن هل مرّة حبّينا نخلق تفاعل مع الناس وتفاجأنا بمدى محبتهم لـ”مين قال”.
مين قال انو طموحك اكبر من كم دقيقة عالهوا ولأمتين باقي هيك؟
كثرة الحكي ما بتفيد، ودقيقة من الوقت كانت كافية ليتعرّف عدد كبير من الناس علي. طالما عم بعمل شي بحبو فأنا مبسوط.
مين قال ما عندك عروض على غير محطّات ؟ واذا في ليش رفضتها؟
ما بنكر إنو تقدّملي عروض كتيرة ولكن الـMTV أكتر من فرصة عمل، أنا بنتمي لهل محطة.
مين قال ما عم تحضّر شي جديد على شاشة “ام تي في”؟
منحكي بالافكار المطروحة بالوقت المناسب.
مين قال انك مش مهمّش ومش آخد حقك على الشاشة؟
بالنتيجة بينعرض برنامجي ٤ مرات بالنهار، كل يوم، قبل نشرات الأخبار. ما زهقتو مني؟؟؟؟
مين قال انو يلي بتقدملنا اياه كل يوم من معلومات بفيدك كتير الك كمان؟
طبعاً مفيدة لإلي كمان، ومقتنع فيها. على كل حال بحاول طبّق كل هل معلومات بحياتي اليومية. خاصةً المعلومات المتعلّقة بالحفاظ على البيئة.
مين قال انو برامج الالعاب والمنوعات مش هدفك وما بتستهويك؟
مين قال؟!؟
مين قال انك ما بتغار من زملاءك على نفس الشاشة يلي انعطالهم فرص اكبر؟
أكيد في جو من المنافسة ولكن كل شخص بياخد حقّو.
مين قال انو مش ممكن شي نهار تقدم برنامج @mtv؟وليش؟
قدمت أول @MTV سنة الـ2000 وكنت أصغر مقدّم بالمحطة.
مين قال انك مش متأثّر بغير مقدمي برامج ومين هني وليش؟
إجمالاً بتابع مقدمي البرامج الاوروبية ولكن في مقدمي برامج لبنانية وعرب بحترمهم لثقافتهم وللقيمة يلي بيعطوها لبرنامجهم مثل جورج قرداحي.
مين قال انو ما بتغار من مقدم برامج معيّن على الشاشة ومين هوي؟
لما يتساءلوا علي أصحابي بقولولي اني بغار من مقدّم برنامج “ستار أكاديمي” على TF1 .بحب شدّد هيدا الشي مش صحيح .
مين قال انك مكمل تقدم مين قال وشكلك مطوّل؟
أنا AL وبشوفكن بكرا
مين قال انو البير تحومي اصبح نجماً من نجوم “ام تي في” بدقائق قليلة على الهواء؟ نحنا قلنا وبشوفكن البير قبل نشرة الاخبار…
نذكر ان برنامج “مين قال” هو من انتاج بيار رباط ومن اعداد ناي نفاع.
