بالصوَّر: في “سيرة وانفتحت” أمس، مداخلة غير متوقعة من نضال الأحمدية، وقمر تصرخ غاضبة عيب عيب

“هاي زافين… معك قمر”… وسمع المشاهدون صوت قمر وهي تتحدث للمرة الأولى منذ احترافها الغناء قبل خمس سنوات. قالت قمر: “أنا بس بدي قول وأتمنى من الصحافيين الموجودين معك إنو ما في داعي للكلام الجارح، هيدا أولاً. ما قدرت أعرف أسماء اللي معك بس ما في داعي يقولوا مين هيّ قمر… بتشبه هيفا… لا فتت على الفن لأقلد هيفا ولا لأقلد غيرها وما حدا أصلاً حطني بصفها، إذا الناس هني شبهوني هيدا الشي بيرجع للناس. أما بالنسبة لإبني، وبالنسبة لموضوعي، معليش بس بتمنى ما حدا يتدخل فيه نهائياً.

تابعت قمر: “عفوا زافين معليش، هيدا موضوع بخصني أنا، وهيدا موضوع أنا بحلّو مش إنتو بتحلولي ياه. يعني مش ممكن هيدا الكلام، كل واحد عم يطلع بموّال أو بكلام جارح كثير نحكى عني”.
إيليان الحاج: “بس إنت شخصية عامة يا قمر”.

قمر: “أنا بنت عادية، ما بدّي كون شخصية عامة… بس ما بسمح تيجي وحدي ما بعرف مين هيي تقول مين هيي قمر. عيب… عيب… لو كنت بنت أبصر….. البنات…. مش ممكن تحكي عليي بهذه الطريقة”.
زافين: “أول شي وقتي خلص، ثاني شي أنت معصبي وما بدّي تعصبي على الهواء”.

قمر (تبكي): “مش قصة معصبة… أنا وترتولي أعصابي مش ممكن إنتو اللي عم تعملوا”.
زافين: “خلينا نحكي بهيدا الموضوع تحت الهواء على رواق”.

قمر: “ممكن انا إطلع معك بحلقة…”.

زافين: “للأسف وقتي خلص… امنكفي بهيدا الموضوع الأسبوع المقبل. إلى اللقاء”.

هكذا ختم زافين حلقة برنامج “سيرة وانفتحت” ليل الاثنين الماضي والتي تناولت نقاشا حاميا حول الصحافة الفنية بين الخبر والثرثرة والفضيحة وابتزاز الفنانين والمشاهير بأخبار الكواليس. كما تطرقت الحلقة إلى صورة الطفل التي نسبتها مجلة “الجرس” لمولود الفنانة قمر بعد إعلان الإعلامية والأديبة مريم شقير ابو جودة أن الصور تعود إلى حفيدها خليل وليس لابن قمر. وطالب زافين المجلة بتوضيح حول هذا الموضوع.

وفي اتصال غير متوقع ردت ناشرة مجلة الجرس ورئيسة تحريرها نضال الأحمدية بالقول: “فيما يخص قضية الست مريم شقير أبو جودة، أريد أن أعتذر لأنني لم أهنئها، يمكن هذه غلطة، هي صديقتي وأنا بعرف إتصافى معها. أما الطفل الذي وضعت صورته فليس ابن الست مريم، وهذا الأسبوع ولأنه يتم استفزازي بكل هذه الطريقة سأضطر أن أنشر صور جديدة كنت قد منعت من نشرها للأمانة، سآخذ إذن من قمر وأنشر الصور لأن هذا الصبي أنا حممته مع الـ nurse (ابن قمر) وكنت بالملابس الخاصة بالتعقيم. فيمكن الست مريم اعتقدت أنه هذا هو الصبي لأن كل الأطفال مغطين بنفس الغطاء الأزرق ويلبسون بنفس الطريقة الأزرق، والبنت بالزهر ومغطاة بغطاء زهر. بس كنت بدّي قول هيك ويعطيكن العافية”.

أعقب اتصال الأحمدية اتصال من السيدة الهام ابو جودة محبوب (ابنة مريم شقير ابو جودة) أكدت فيه أن الصور المنشورة في الجرس تعود إلى ابنها. وقالت: “أنا عارفة كل قطعة جبتها لإبني. وعارفة شو كنت ملبستو الثياب الأزرق والأبيض. ليش هيك قالت نضال ما بعرف… حتى قمر اتصلت بماما وقالت لها منيح أنو حفيدكن اللي على الغلاف مش حدا غريب”.

ضيوف الحلقة: الناقدة والكاتبة نداء عودة، رئيسة تحرير مجلة “كل النجوم” رانيا شهاب. المستشارة الإعلامية الفنية إيليان الحاج، صاحب برنامج “ميكروسكوب” الإعلامي روبير فرنجية.

برنامج سيرة وانفتحت إعداد وتقديم زافين قيومجيان
الساعة 9:45 ليلا بتوقيت بيروت والمملكة العربية السعودية